* పంచాయతీ నిర్ణయాల్లో ప్రజల పాత్ర ఎక్కడ?
* గ్రామ సభ లేకుండా నిర్ణయాలు
* పంచాయతీ భూములపై అనుమానాలు
దేవనకొండ, ఏప్రిల్ 1 (స్ఫూర్తి పత్రిక):
గ్రామ పంచాయతీకి చెందిన ఆస్తులు, భూములు, సదుపాయాలు—ఇవి ఒక్క వ్యక్తి లేదా ఒక్క వర్గానికి చెందినవి కావు; ఇవి గ్రామ ప్రజల సమిష్టి ఆస్తులు. కానీ ఇటీవల దేవనకొండ గ్రామంలో వెలుగులోకి వచ్చిన కొన్ని పరిణామాలు ఈ ప్రాథమిక సత్యాన్ని ప్రశ్నించేలా మారుతున్నాయి. గ్రామ పంచాయతీ ఆధ్వర్యంలో మటన్ కమేల కోసం నిర్మించిన ఒక గదిని కొందరు ప్రముఖ దేవాలయానికి కేటాయించాలనే ప్రయత్నాలు జరుగుతున్నాయన్న ప్రచారం గ్రామంలో చర్చనీయాంశంగా మారింది. ఈ విషయంపై పంచాయతీ కార్యదర్శిని ప్రశ్నించగా అలాంటి నిర్ణయం తీసుకోలేదని, ఏదైనా ఉంటే గ్రామ సభలో చర్చించి మాత్రమే నిర్ణయం తీసుకుంటామని స్పష్టం చేసినప్పటికీ, ఈ అంశంపై సందేహాలు పూర్తిగా తొలగిపోలేదు. ముఖ్యంగా సర్పంచ్ పదవీకాలం ముగియబోతున్న సమయంలో ఇలాంటి నిర్ణయాలు తీసుకునే ప్రయత్నాలు జరుగుతున్నాయా అనే అనుమానం ప్రజల్లో వ్యక్తమవుతోంది.ఇది ఒకవైపు ఉండగా, చెన్నకేశవ స్వామి ఇనాం భూములకు సంబంధించిన మరో అంశం కూడా గ్రామంలో చర్చకు దారి తీస్తోంది. ప్రజలకు గృహ నిర్మాణం కోసం కేటాయించిన ప్లాట్లలో భాగంగా పాఠశాల, గుడి, కమ్యూనిటీ హెల్త్ సెంటర్ వంటి ప్రజా అవసరాల కోసం సుమారు 18 సెంట్ల భూమిని కేటాయించినట్లు సమాచారం. అయితే ఇప్పుడు అదే భూమిని తిరిగి దేవాలయ అవసరాల కోసం తీసుకోవాలని కొందరు ప్రయత్నిస్తున్నారనే అభిప్రాయం వ్యక్తమవుతోంది. ఇది కేవలం భూమి విషయమే కాదు ఇది ప్రజల భవిష్యత్తుకు సంబంధించిన విషయం. ఒకసారి ప్రజలకు కేటాయించిన భూమిని తిరిగి తీసుకోవడం అంటే అక్కడ ఇప్పటికే గృహాలు నిర్మించుకున్న వారి హక్కులను ప్రశ్నించడం, వారి భవిష్యత్తును అనిశ్చితిలోకి నెట్టడం.ఇక్కడ అసలు ప్రశ్న ఏమిటంటే గ్రామ ఆస్తులపై నిర్ణయం తీసుకునే అధికారం ఎవరికుంది? ప్రజలతో చర్చించకుండా, గ్రామ సభ నిర్వహించకుండా, కొంతమంది మాత్రమే నిర్ణయాలు తీసుకుంటే అది ప్రజాస్వామ్యానికి విరుద్ధం కాదా? గ్రామ పంచాయతీ వ్యవస్థలో గ్రామ సభనే అత్యున్నత వేదికగా భావిస్తారు. ప్రతి నిర్ణయం ప్రజల ముందే, పారదర్శకంగా తీసుకోవాలి. కానీ అలాంటి ప్రక్రియ లేకుండా జరిగే ప్రయత్నాలు అనుమానాలకు తావిస్తాయి.ధార్మిక సంస్థలు సమాజానికి అవసరమే, గౌరవించాల్సిందే. కానీ ప్రజా అవసరాలకు కేటాయించిన భూములను, సామూహిక ఆస్తులను మార్చి వాటిని ఇతర అవసరాలకు వినియోగించడం ఎంతవరకు సమంజసం అనే ప్రశ్న తప్పకుండా తలెత్తుతుంది. పాఠశాల, ఆరోగ్య కేంద్రం, ప్రజా సదుపాయాలు ఇవి గ్రామ అభివృద్ధికి మూలస్తంభాలు. ఇవి బలహీనపడితే గ్రామ భవిష్యత్తే దెబ్బతింటుంది.ఈ నేపథ్యంలో అధికారులు, ప్రజాప్రతినిధులు, గ్రామ పెద్దలు బాధ్యతాయుతంగా వ్యవహరించాల్సిన అవసరం ఉంది. ఏ నిర్ణయం తీసుకున్నా ప్రజల అభిప్రాయాన్ని తెలుసుకుని, గ్రామ సభలో చర్చించి, పారదర్శకంగా తీసుకోవాలి. లేకపోతే ఇలాంటి అంశాలు రేపటి రోజుల్లో పెద్ద వివాదాలకు దారి తీసే ప్రమాదం ఉంది. గ్రామ ఆస్తులు ఎవరి సొత్తు కావు అవి ప్రజలవి. ప్రజల అవసరాలే ముందు ఉండాలి, నిర్ణయాలు కూడా అదే దిశగా ఉండాలి, లేదంటే నిశ్శబ్దంగా ప్రారంభమైన ఈ వివాదం రేపు పెద్ద సమస్యగా మారడం అనివార్యం.